Выйшаў новы раман Алеся Аркуша «Сядзіба»

Пісьменніца Людміла Шчэрба назвала новы твор полацкага літаратара «цікавым, інтэлігентным, сучасным, гістарычным і містычным, які напісаны з любоўю да Полацка і Беларусі, да яе гісторыі і сучаснасці».

Іншая пісьменніца Марыя Роўда, якая першая адгукнулася на выхад кнігі, адзначыла: «Твор цікавы, праглынаецца на адным дыханні. Тут і гісторыя Полацка, і сучасная літаратура, і містыка, і простае жыццё — наколькі яно можа быць простым у мастакоў і пісьменнікаў. Калі сыходзіць з таго, што кожны твор пабудаваны вакол нейкай ідэалогіі (хай бы светапогляду аўтара), то ідэалогія рамана цалкам «лягла на душу». Па асацыяцыі кніга нагадала фільм Бруно Дзюмона «Ma Loute». Сюжэты ў іх, натуральна, розныя, але ёсць агульныя лініі: пераправа, знікненне людзей і гэтак далей».

Першы рэліз кнігі адбыўся сёлета 16 лютага на платформе Kniharnia.by у электронны фармаце. «Нічога не знікае ў невараць, усё недзе існуе ў паралельным свеце. На полацкай сядзібе адбываюцца дзіўныя здарэнні. Метафізічнае жыццё ценяў і прывідаў пранікае ў рэальны свет» — так анансуе раман Kniharnia.by.

Дарэчы, выданне ўвайшло ў топ-5 самых прадаваных кніг за люты. Днямі ж «Сядзіба» пабачыла свет і ў папяровым выглядзе, дзякуючы супрацоўніцтву выдавецкай ініцыятывы «Полацкае ляда» і беластоцкага выдавецтва «EkoPress».

Як паведаміў аўтар кнігі, першая прэзентацыя «Сядзібы» адбудзецца ў Полацку ў траўні.

Алесь Аркуш — беларускі паэт, эсэіст, выдавец. Аўтар тэксту гімна горада Полацка і песень шэрагу рок-гуртоў: «Мясцовы час», «RIMA», «Sumarok».